Կոլումբիայի նախագահ Գուստավո Պետրոն հայտարարել է, որ իր երկիրը խզում է դիվանագիտական հարաբերությունները Իսրայելի հետ, քանի որ նրանց կառավարությունը և նախագահը ցեղասպանություն են իրականացնում Գազայի հատվածում։ «Եթե Պաղեստինը մեռնի, կմեռնի և մարդկությունը», - հանրահավաքում հայտարարել է Պետրոն՝ արժանանալով պաղեստինամետ ցույցի մասնակիցների ծափերին։
Իսրայելի իշխանությունները Կոլումբիայի նախագահի հայտարարությունը գնահատել են որպես հակասեմական և ատելություն հրահրող, պնդելով, որ նրա դիրքորոշումը հավասարազոր է «Համաս»-ին գովաբանելուն։
ԱՄՆ-ը և Եվրամիությունը «Համաս»-ը համարում են ահաբեկչական խմբավորում։ Անցած հոկտեմբերի 7-ին «Համաս»-ի գրոհայինները հարձակվեցին իսրայելական բնակավայրերի վրա, ինչին հետևեց Իսրայելի բանակի պատասխան գործողությունը Գազայի հատվածում։ Պատերազմը շուրջ 7 ամիս շարունակվում է։
